Blog

Nga Ardian Lekaj / 2021,një vit shpresëplotë!

Ky fillim shkurti na tregon se kaloi edhe një muaj nga Viti i Ri 2021. Të gjithë ne e kemi pritur këtë vit të ri me një padurim I cili më shumë se asnjëherë tjetër kishte të bënte me harresën që duam të kemi ndaj vitit 2020. Për të gjithë ne ky vit të cilin sapo e kemi prekur, duket se është shpresëplotë  se do të jetë viti i ndryshimeve thelbësore dhe pse të mos e quajmë “viti i shpresës” pasi vaksina  Covid 19 e zbuluar së fundmi ka filluar të përdoret në masë në një pjesë të madhe të botës. Njerëzimi ka filluar të guxojë të ëndërrojë dhe të shpresojë për rikthim tek jeta normale e dikurshme. 2021 me siguri do jetë viti i ringritjes dhe rindërtimit. E sigurtë që 2021 do të mbahet mend si viti kur Bashkimi Europian i tha lamtumirë Britanisë së Madhe, ku Donald Trumph i tha lamtumirë Shtëpisë së Bardhë dhe shpresojmë që ti themi edhe lamtumirë virusit që ka dominuar mënyrën e jetesës sonë gjatë 12 muajve të fundit. Lamtumira ndaj Covid -19 duket se është ajo më e bukura që njerëzimi mund të thotë në këtë vit. Joe Biden dhe Kamela Harris premtuan në fushatë e tyre “Build Back Better”. Me “Better” me siguri ata kanë dashur të nënkuptojnë “Ndryshe”. Pas kësaj pandemie do të dalin mundësi që deri më sot nuk i mendonim ose i nënvlerësonim. Brezat e ardhshëm do të zbulojnë shtigje të reja.

Realiteti i ri

Situata e sotme ka një influencë të jashtëzakonshme në identitetin tonë si individë. Kjo pandemi na ka detyruar të mendojmë më thellë për çdo gjë që ndodh rreth nesh. Është fare e qartë se në momente krizash ndodhin ndryshime dhe është më e thjeshtë të pranohen nga njerëzimi. Le te marrim si shembull digjitalizimin. Patjetër që të gjithë e kishim të qartë se sa i rëndësishëm ishte digjitalizimi, por nga situata e krijuar u detyruam ta përshpejtojmë këtë proces. Platoni kishte të drejtë kur thoshte “nevoja është mamaja e inovacionit”.

Periudha që ne po jetojmë sot është një nga periudhat më interesante të njerëzimit. Transformohu, ndrysho, mbijeto apo zhduku. Kur ke një ide, je në rregull, kur nuk ke, je i pavlerë. Në botën e sotme jeta po mbizotërohet nga shpejtësia e përshtatjes. Printerat 3D sot nuk i kemi në shtëpi, por e ardhmja do të na e sjellë edhe këtë. Atëherë dhe logjistika globale do të ndryshojë plotësisht. Sot janë shumë të paktë ata që e kujtojnë kompaninë Lycos të krijuar nga belgu, Robert Cailliau në vitin 1993, që bëri revolucion në internet duke hapur “webin” për publikun. Sot të gjithë flasin për “google” (96%), “bing” (3%) apo “yahoo” (0.5%) dhe bota e komunikimit, kërkimit apo reklamës nuk imagjinohet më pa ato. Sot, në njëfarë mënyre jemi bërë si astronautë, pasi vetëm astronautët mund të flasin për eksperiencat e tyre të izolimit total. Dhomat e reja të izolimit, sot quhen “zoom”, “webex”, “teams” etj. Pjesëmarrësit në këto platforma me apo pa kënaqësi janë çuditërisht të bindur dhe ngrenë dorën për të thënë diçka apo kur nuk kanë interes e kanë fare të thjeshtë, të fshihen në qetësinë e pjesëmarrjes. Pjesa emocionale është minimalizuar apo zhdukur fare ndërkohë kapitalizmi po zhvillohet. Me siguri që për mbesat apo nipërit tanë, që nesër do të udhëtojnë nëpër planete të reja, do të jetë e vështirë ta imagjinojnë dhe kuptojnë  këtë periudhë pandemike që ne përjetojmë sot.

Nga ana tjetër, njerëzit, dalin shumë shpejt në konkluzione. Çdo ditë dëgjojmë se mënyra se si po jetojmë sot është “realiteti i ri”. Konkluzion i pabazuar në argumenta, pasi askush nuk është në gjendje të parashikojë se çfarë do na sjellë e ardhmja. E ardhmja është gjithmonë ndryshe dhe nuk ka garanci parashikimi. Askush nuk mund ta thotë sot se kush do të mbajë timonin në të ardhmen?! Të japësh komente për dicka është fare e thjeshtë, të japësh rrugëzgjidhje do njohuri, ta zbatosh në praktikë do eksperiencë.

Viti 2021, do të jetë viti i tranzicionit dhe shoqëria do ti hedhë sytë nga e ardhmja për ta projektuar atë. Gjatë kësaj periudhe krize jo çdo gjë ishte negative. Patëm mundësinë që të mendojmë më gjatë dhe më me qetësi për të ardhmen. Kompanitë do të riorganizohen. Produktet e domosdoshme  të jetës do të prodhohen sa më afër tregut konsumator në mënyrë që edhe lëvrimi i tyre të jetë sa më i sigurtë dhe i shpejtë. Teoria “just in time” do të kthehet në “just in case”. Qeveritë e panë qartë se prodhimet farmaceutike janë po aq të rëndësishme sa dhe ato bujqësore apo blegtorale.Tashmë detyra i mbetet brezave të ardhshëm. Në rini je në periudhën e “serendipity” dhe pa e menduar fare do të thërrasësh “eureka”. Rinia është guximtare dhe ka fantazi, kurajo dhe energji për të realizuar ndryshimin. Elementët që do të marrin përparësi janë: riformatimi i sektorit publik, modernizimi i politikave sociale, rishkollimi i popullsisë dhe ndërtimi i një infrastrukture të re digjitale. Me gjithë keto elementë, jeta do të marrë impulse të reja.

 

Post a comment