Blog

Sipërmarrësja Saranda Iseni: Është koha të fokusohemi te potencialet që ofron Shqipëria

Sarada Iseni u largua nga vendlindja e saj rreth dy dekada  më parë për të provuar veten në Suedi. Sot ajo është një juriste dhe sipërmarrëse. Për dy vite ajo ka drejtuar Rrjeti i Bizneseve të Diasporës Shqiptare në Suedi, degë e Rrjetit Global të Bizneseve të Diasporës Shqiptare i cili aktualisht ka degët e tij në rreth 30 shtete në mbare botën.

Për të krijimi i Dhomës së Biznesit të Diasporës Shqiptare është mundësia e kërkuar prej kohësh nga sipërmarrësit shqiptar nëpër botë, jo vetëm si një pikë takimi por edhe si një vend të cilin mund ta quajnë plotësisht Shtëpia e tyre në Shqipëri.

Znj. Iseni sa i rëndësishëm është bashkimi i Bizneseve të Diasporës Shqiptare në këtë moment?

Faktikisht është shumë i rëndësishëm pasi momentalisht ndodhemi në vlugun më të madh të zhvillimit ekonomik. Mendoj se brenda shumë pak kohe, ndoshta brenda pesë viteve të ardhshme Ballkani, veçanërisht Shqipëria dhe Kosova do të jenë furnizuesit më të mëdhenj në Evropë, jo vetëm për sa i përket produkteve, prodhimeve të ndryshme, por pse jo edhe sipërmarrjeve.

Rrjeti i Bizneseve të Diasporës Shqiptare është një strukture që ka degë në shumë vende të botës, ju keni drejtuar për dy vite (2015-2017) degën e Suedisë. Si funksionon kjo strukturë?

Është një ndër iniciativat më të mira që është bërë tek komuniteti jonë shqiptar, sepse ne jemi të njohur për individualizmin tonë, të fortë sa nuk ka fund. Por më në fund erdhi një iniciativë që ne bashkarisht të bëhemi më të fuqishëm. Nga përvoja 2 vjeçare e imja mund të them se është një ndër përvojat më frytdhënëse që kam pasur. Për sa i përket njohjes së njëri-tjetrit, por dhe njohurive se çfarë bëjnë njerëzit tanë e çfarë mendimesh kanë, çfarë dëshirash kanë, çfarë përvojash kanë në vendlindje për shembull, ku pjesa më e madhe kanë arritje jashtëzakonisht të mëdha.

Anëtarët e Rrjeti i Bizneseve të Diasporës Shqiptare në Suedi padyshim janë njerëz të arrirë. Sa prej tyre e shohin Shqipërinë si një mundësi për të zhvilluar më tej biznesin e tyre?

 

Shqipëria gjithmonë ka qenë ëndrra e të gjithë ne mërgimtarëve. Dhe unë mendoj se pjesa më e madhe e kanë një dëshirë duke parë këtë potencial, këtë kapacitet, siç e thashë edhe më parë këtë vlug të zhvillimit ekonomik në çdo sferë, p.sh aktualisht investimet në energjinë solare përbëjnë interese për vendin tonë. Pastaj është përfitimin e energjisë nëpërmjet mullinjve të erës, edhe kjo është një industri me potencial zhvillimi. Pra janë këto disa nga profilet e biznesit që përbëjnë atraksion dhe potencial për mua dhe shqiptarë të tjerë dhe që po përpiqemi të afrojmë investitorë të mëdhenj. Duhet të fillojmë të zhvillojmë dhe të vëmë në përdorim të mirat e këtij vendi, sepse Shipëria është një vend që ofron gjithçka duke u nisur nga turizmi.

A ka anëtarë të Rrjeti i Bizneseve të Diasporës Shqiptare në Suedi që aktualisht kanë investuar në vendlindje?

Po, faktikisht ka plot. Në Shqipëri, në rajon, në Kosovë, në Mal të Zi. Ka dhe nga ato me përvoja të hidhura, por dhe nga ato me përvoja shumë të mira.

 

Në profesionin tuaj si juriste, jeni fokusuar më shumë tek Konsulenca Ligjore  e Sipërmarrësve. Sipas jush kuadri ligjor në Shqipëri, çfarë lehtësirash ofron për investitorët që duan të vendosen këtu?

Këtu nuk kam njohuri të plota, por do kisha pasur dëshirë që gjërat të ishin shumë korrekte, shumë të qarta dhe procedura të mbyllej në një kohë shumë të shkurtër. Ka shumë burokraci që vonojnë procesin. Shpresoj që Dhoma e Biznesit të Diasporës Shqiptare të ofrojë së paku lehtësira në këtë drejtim. Pra që të mbështesë dhe të shohë me përparësi çdo investitor që troket në derën e saj dhe ti lehtësojë barrën e procedurave burokratike.

 

Ju jeni anëtarja më e re e Dhomës së Biznesit të Diasporës Shqiptare mund të themi se këto janë disa nga pritshmëritë tuaja?

Mbi të gjitha ajo që më ka gëzuar më së shumti është se ne tashmë kemi një shtëpi, një institucion, një vend, një dhomë ku mund të drejtohemi. Për mua është e mjaftueshme të di që këtu do të marr të gjitha të dhënat dhe detyrimet, të gjitha të drejtat, donacionet, kërkesat, komunikimin. Sepse cilido sipërrmarrës ose jo, që vjen nga një vend tjetër e ka kohën e kushtëzuar ndaj është e rëndësishme që në një zyrë të vetme të gjejë të gjithë gamën e informacionit dhe shërbimeve që kërkon.

E kemi theksuar shumë herë është diçka që mungonte dhe tani me krijimin e Dhomës së Biznesit të Diasporës Shqiptare kjo dëshirë u bë realitet.

Besoj se Dhoma do të jetë një qendër e bashkimit të sipërmarrësve por edhe një hap drejt fuqizimit ekonomik të vendit tonë. Këto janë edhe interesat tona, sepse kjo është një situatë fitoreje dy palëshe, të gjithë fitojnë nga kjo.

Support